Пелистер не успеа да стигне до нова победа во Втората македонска фудбалска лига, откако на гостувањето кај Кожуф во рамките на 11. коло одигра нерешено 1-1. „Зелено-белите“ имаа предност на полувремето, но домаќините во продолжението успеаја да стигнат до израмнување.

Битолчани добро го отворија натпреварот и први ја затресоа мрежата на противникот. Во 20-та минута, по корнерот на Мартин Мирчевски од левата страна, највисок во шестнаесетникот беше Кире Ристевски, кој со удар со глава донесе водство од 0-1 за Пелистер.

Со минимална предност „пелистерци“ заминаа на паузата, но на почетокот од второто полувреме Кожуф успеа да израмни. Во 54-та минута по ударот на Боев, топката се одби од стативата, а потоа од голманот Димовски и заврши во мрежата за 1-1.