Мартин Мирчевски се врати дома – ново засилување за ФК Пелистер

ФК Пелистер со големо задоволство го претставува своето најново засилување – Мартин Мирчевски, кој по 11 години повторно го облекува зелено-белиот дрес и се враќа таму каде што ги направи своите први фудбалски чекори.

По богато интернационално и домашно искуство, Мирчевски се реши да се врати во својот матичен клуб и да биде дел од проектот за враќање на Пелистер на местото што му припаѓа – во елитата на македонскиот фудбал.

Неговото искуство, квалитет и лидерски карактер ќе претставуваат голем адут за зелено-белите во претстојната сезона, во која единствената цел е експресно враќање во Првата македонска фудбалска лига.

Добредојде дома, Мартин!

Мартин Мирчевски со првите импресии по неговото враќање во Пелистер, но и неговите очекувања:

,,Како играч, ќе го дадам својот максимум за да му помогнам на клубот повторно да расте и да се развива по вистинскиот пат.”

,,Ми се допадна проектот што ми беше претставен и верувам дека, доколку сите работиме максимално професионално, ФК Пелистер многу брзо ќе се врати таму каде што му е местото.”

,,Се надевам дека навивачката група Чкембари, како и целата битолска јавност, ќе ми простат за мојот премин во Вардар. Би сакал да ставиме точка на минатото и сите заедно да се радуваме на секоја победа и на секој успех на Пелистер.”

,,ФК Пелистер е име, презиме и бренд во македонскиот фудбал и е поголем од сите нас. Без разлика на разочарувањата и емоциите од минатото, време е тие да останат зад нас. Нашата заедничка цел е јасна – експресно враќање во Првата македонска фудбалска лига.”

,,Само сплотени, како еден тим, можеме да ја оствариме таа цел.”

09 јули 2026