Натпреварот започна офанзивно за битолчани кои уште во првите минути покажаа желба за рано водство. Првата прилика ја имаше капитенот Мирко Ивановски кој шутираше над голот, а веднаш потоа се закани и Булатовиќ со удар од далечина, но без посакуваната завршница.

Пелистер стигна до погодок уште во петтата минута кога по центаршут на Булатовиќ, Марјан Ристовски ја испрати топката во мрежата на Башкими. Сепак, по ВАР проверка голот беше поништен поради офсајд ситуација.

„Зелено-белите“ продолжија со иницијативата и создаваа нови прилики пред противничкиот гол. Во 19-та минута Булатовиќ повторно се најде во добра позиција по изведен корнер, но неговиот удар заврши покрај голот.

Притисокот на Пелистер конечно донесе резултат во 24-та минута. По одлична акција и асистенција од Швајц, Милан Србијанац успеа да ја смести топката во мрежата за водство од 1-0 и голема радост на трибините во Битола.

Само неколку минути подоцна битолчани беа блиску и до втор погодок. Голманот Стојковски излезе далеку од својот гол, а Булатовиќ се обиде со лоб удар, но топката заврши во стативата.