Битолчани уште од самиот старт го наметнаа своето темпо и создадоа неколку сериозни можности пред голот на гостите. По обидите на Петар Петковски, Филип Петровиќ и слободниот удар на Стефан Спировски, Пелистер стигна до водство во 25-та минута. Петковски одлично проигра во простор, а Филип Петровиќ со прецизен дијагонален удар со левата нога ја затресе мрежата за 1-0. По неколку минути игра „зелено-белите“ повторно ја зголемија својата предност. Во 30-та минута Спировски испрати одлична асистенција, а Петар Петковски излезе сам пред противничкиот голман и сигурно реализираше за 2-0. Нападите на Пелистер продолжија и во 39-та минута Србијанац одлично центрираше по земја од левата страна, а Филип Петровиќ од непосредна близина го постигна својот втор погодок на натпреварот за убедливи 3-0. До крајот на првото полувреме, битолчани стигнаа и до четврти гол, кога во 44-та минута по убава акција на мал простор, Петковски повторно беше прецизен и ги постави конечните 4-0 пред паузата.