„Зелено-белите“ подобро го отворија натпреварот и во поголем дел од првото полувреме ја имаа иницијативата, барајќи начин да стигнат до водство. Пелистер создаваше притисок и се обидуваше да ја контролира играта, но без конкретна реализација пред противничкиот гол.

На стартот од второто полувреме битолчани се најдоа во резултатска негатива, по што мораа да тргнат поофанзивно кон противничкиот гол. Пелистер создаде неколку добри можности, а во 64-та минута доби и пенал. Одговорноста ја презеде капитенот Мирко Ивановски, но не успеа да ја затресе мрежата.

И покрај тоа, фудбалерите на Пелистер не се предадоа и до самиот крај веруваа во пресврт. Кога изгледаше дека натпреварот е решен, во последните секунди од продолжението Стефан Спировски испрати одлична топка во шеснаесетникот, а Петар Петковски со удар со глава ја смести во мрежата за големо славје и резултат 1-1.